تــــــــــــــــــــــــــــــــــاج

جانى تاج من حبيبتى wish I was butterfly
و لأنه من حد عزيز مضطريه اجاوب
كنا هنقول ايه اه اسئلة التاج:
لو قالولك اختار عصر من عصور مصر علشان تعيش فيه تختار اى عصر و فى عهد اى حاكم .. واشمعنى؟
عصر الفتح الأسلامى لعمرو بن العاص
عشان احس بمشاعر المسلمين وفرحتهم فى الوقت ده و العدل اللى كان فى الوقت ده
اول اولويه فى حياتك عيلتك ولا شغلك ولااصحابك؟
اسرتى بالتحديد وبعدين اصحابى المقربين اللى بعتبرهم بقيت عيلتى وبعدين شغلى "المذاكره او الابحاث يعنى :-)"
لو انت حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم عادل؟
مش عارفه يمكن عشان متحطش فى الموقف ده قبل كده وبعدين انا اخاف صراحه اوى لأنى عاطفيه اوىىىىىىىىىىىى
بس لواجبرت على كده هحاول قدر الإمكان إن شاء الله
اللى بيبوظ الحكام .. نفسهم؟ ولا الشعب؟ ولا الحاشيه المقربه؟
نفسهم اول حاجه لأن النفس أماره بالسوء ولو الواحد مجهدهاش هتوديه فى مصيبه
وتانى حاجه الحاشيه المقربه لو هى حاشيه فاسده هتكون سبب فى فساد الحاكم والحكم
مين أكتر اعلامي مصري بتحترمه؟
إعلامى مصرى!!!!!!!
اممممممممممممممم
مش عارفه اجاوب لأنى بصراحه مش منسجمه اوى مع الحاجات دى يعنى
لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟
انا مبشتغلش اساسا لسه طالبه بس انا بحب مجال تخصصى جدا اللى هو تدريس الانجليزى بس فى مكان تتوفر فيه شروط التعليم الجيد صراحة
لو كنت علمى كنت هحب اكون باحثه كيميائيه فى مجال الأدويه وأحاول اكتشف علاج للأمراض اللى لسه مكتشفلهاش علاج
شكلى شطحت اوى :-) بس هى دى الحقيقه بجد
ايه تانى بلد تتمنى تعيش فيها بعد مصر؟
مكة طبعا الحرم ومكان مولدى وكل حاجه حلوه
انجلترا بس مش كتير كام سنه كده
بس كل ده بشرط انقل اللى انا بحبهم معايا هناك :-)
اوصف ليا ترتيبات اجمل فرح ممكن تحضره
اممممممممممممممممم
لسه كان فى بالى من كام يوم اقول لو مسكونى ترتيب الأفراح ... بس محدش يعترض على اللى انا بعمله
هعمل حاجات غريبه جدا مش عارفه اجمعها فى بالى حاليا
بس كنت هكد على حاجه قليل اوى اللى بيعملوها
وهى فقره خاصه لأستعراض صور العروسه والعريس فى فترات حياتهم المختلفه ويا حبذا لو فى مقاطع فيديو او شريط تسجيل ليهم وهم اطفال
بتراعي كلام الناس والقيل والقال؟ لو اه او لو لا قول لى ليه؟
فى مواقف ومواقف
صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟
ببساطه
هروووووووووووووووح فيها
الموبايل ده والنت اموت لو حد فيهم فصل يوم
الموبايل عندى والرسايل وسيلة الاتصال الرئيسيه بأحبابى اللى نفسى يكونوا عايشين معايا على طول
والنت بحس انى مقطوعه عن العالم لما يتقطع احبابى بتوع الدونات والاأيميلا اللى بقاله فتره ما حدش بيكون قاعد لما بدخل يعنى بس برضه
الكاميرا الديجتال عندى مش مهمه بس وجودها مهم جدالأنها الوسيله اللى منها بعرف اشوف اولاد اخويا :-(
الحمام الزاجل والاحصنه بتاخد وقت طوييييييل اكون مت على مايوصلنى رد صاحبتى لو انا بطمن عليها مثلا
بس كل له عيوبه ومميزاته
السعاده هى؟
عدم الانشغال بالناس وتعاملهم معاك
يعنى تتعامل باخلاقك بس ميهمكش كلام حد ولا تقصير حدد
وطب السعاده الاولى هى استشعار القرب من الله نفسى احس الشعور ده بجد
عندك أمل ؟؟ أسبابك ؟
مش دايما
مش من النوع اللى متفائل على طول
لما تحب تهرب من كل شئ بتروح فين؟
السطح ...
:-) بحب اقعد اعيط فوق لوحدى بحرقه كده من غير ما حد يسمعنى
امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟
لما حسيت بتغير شخصيتى الجامد بعد وفاة امى وتحمل مسؤليتى الكامله حسيت ان اغلب اللى فى سنى اصغر منى فبقيت بتعامل مع الاصغر منى على انهم اخواتى الصغننين رغم ان مليش اخوات صغيرين بس بحب اوى انى احس ان ليه اخت صغنونه كده وبتعامل مع اللى اكبر منى كأنهم فى سنى
أما اللى فى سنى بحس انى تايهه وسطهم
لما بتعمل عمل خيرى بيكون ايه هو دافعك الاول؟
الثواب
بتشرب سجاير؟ لو الاجابه اه ايه شعورك لو شفت ست بتشرب سجاير؟ وليه ؟
لأ الحمد لله
لما بشوف حد بيشرب سجاير بكون عاوزه اعيط صعبان عليه ومخنوقه منه انه بيشرب ومن الريحه
بتعرف ايدك اليمين من الشمال ازاي؟
من الحسنه اللى فى ايدى اشمال بجد والله :-)
ايه اكتر اله موسيقيه بتحبها ؟
الصوت البشرى العذب جدا
فى رأيك ليه الذوق والنخوه اتعدموا؟
اغلب الخلاق والمشاعر الجميله انعدمت بحس انه من التطور وكثرة مشاغل الحياه يمكن طريقة التربيه والانانيه
ايه الحاجه اللى لو حصلتلك تبقى سعيد قوى؟؟؟
اشعر بقربى من الله نفسى بجد ادعولى
اموت بحسن الخاتمه
اشعر ان الناس بتعامل اصدقائها باخلاص بجد ميبقاش كل واحد همه الوحيد نفسه وبس
تختار يبقى عندك...ارض زراعيه ولا احسن عربيات و لا كام عماره و لا فلوس فى البنك؟؟؟؟
فلوس فى البنك اشترى بيهم اللى فاتوا واى حاجه تانيه ابقى حرة التصرف فيهم
البحر و لا النيل؟؟؟
البحر بيثير فى نفسى الكثير من المشاعر والذكريات
مركب و لا طياره؟؟
مركب فى النيل وقت الغروب او الشروق
لكن لو سفر يبقى طياره
مجنون و لا عاقل؟؟
حسب الموقف المواقف اللى محتاجه اكون فيها عاقله بكون عاقله غير كده بكون طقه
تقرأ كتاب و لا تتفرج عليه فيلم؟
اقرأ كتاب لكاتب محترم كده يكون بيخليكى تعيشى الاحداث
لو عنيه تعبانى وزهقانى اموت فى الفرجه على افلام الدراما اليابانيه
تمرر التاج لمين؟؟
ده اصعب سؤال
لسه مش عارفه لما اعرف هقولكم :-)