.jpg)
موقف مريت به اليوم اثناء خروجى من التربية العملية
آلامنى الموقف و أثر فىّ جدا جدا بجد ...
المدرسة اللى بتدرب فيها بتقع جنب مدرسة ابتدائى
اثناء خروجى من المدرسة سمعت طفل بيضحك على آخره و عمال يقول لصحابه الشحات اهه ... الشحات اهه يا عيال
انا كنت فى البدايه فكراه بيهزر مع واحد صاحبه
فبصيت
و كانت المفاجأه بالنسبه لى صدمه مؤلمه جدا ....
لقيت طفل فى سن الطفل ده تقريبا ثمان سنوات كده صغير جدا لابس بنطلون مقطوع ...وبلوفر مخروم خرم كبير من ظهره لدرجة أن عظام ظهره باينه ... ماشى منكسر جدا ولازق فى الحيطه
والتانى قاعد ينادى ويقهقه على آخره
شحات أه يا عيال بص بص ....
الطفل نفسه انكسرت اكتر واكتر وقعد يبص نظرات كلها ألم للطفل التانى وقعد يستخبى ورا عربيه
رحت للطالب ده وقلتله استنى كده ...
أنت مالك وماله ليه بتضايقه وهو ماشى فى حاله ... ليه بتعمل كده ... أنت تحب تكون مكانه !!!!!!!!
سكت وخفض رأسه وقالى لأ !
قلتله أنت تعرف ظروفه أيه ؟!!!!
أنت أهلك ماشاء الله بيلبسوك احسن لبس حذاء وبنطلون و قميص و شنطه و بيصرفوا عليك و يعلموك
أنت تعرف هو أيه ظروفه !!
سكت و اتخرص خالص ومشى بعيد وهو باصص فى الأرض
اللى انا بستغرب عليه المدرسة دى معلمتهوش العطف على الفقير فى القم اللى مفروض انهم بيعلموها له !
اهله فى المنزل معلمهوش ازاى يعطف على الفقير .
وأنه مفروض يدخر من مصروفه عشان يعطى الفقراء ولو كل فتره !!!!
ياريت كلنا نعلم اطفالنا أن أطفال الشوارع دول والأطفال الفقراء هم بشر زينا زيهم
بيحسوا زى ما بنحس ولهم رغبات وأمنيات وأحلام زينا ...
وأن احنا لازم نعطيهم .... حبذا لو مش فلوس عشان متضرهمش ... نعلم اطفالنا يعطوهم من طعامهم ... يعطوهم ملابس استغنوا عنها ... العاب معدوش بيلعبوا بيها ... حتى لو احنا بنعمل كده بنفسنا لازم لازم نعلم اطفالنا هم اللى يعملوا كده
نعلمهم أن لو لبس زهقت منه او صغر عليك او عندك لبس كتير مش محتاجه هو الطفل بنفسه يجى يقول لمامته عاوز أعطيه لطفل فقير
هناك 6 تعليقات:
جميل اوي اوي كلامك يا سمية
انت هتبقي مدرسة
و يارب تكوني مدرسة كويسة اوي اوي وناجحة ان شاء الله
ياريت بجد ساعتها تعلمي الطلبة اللي معاهم لأن المدرسة مش بقيت تعلم اي حاجة بجد
لا تعليم... ولا حتى قيم
بجد ياريت تفتكري تغرسي فيهم حاجات مؤثرة ومش تقولي ساعتها مفيش وقت أعلمهم من كتر المنهج
جميلة انت :). صحيح.... هو انت في جامعة إيــه؟؟ممكن اعرف لو مش يدايقك؟
صحيح.. :) الصورة اللي انت حاطاها بتاعة الفقير دي بحترمها اوي اوي
بحسها فن بجد :).
welcome back
احتمال هكون معلمه إن شاء الله اعدادى وثانوى
انا صراحه بحب المهنه دى جدا جدا وحتى لو المدراس مش موفره الامكانيات الحديثه بوفر انا اللى اقدر عليه
اكيد لأ الأتنسان ملوش لازمه لو كان بدون قيم
انا فى كلية التربيه جامعة طنطا
انا كده بقى بصراحه اتضايقت وجامد جامد
:-)
سؤال بقى من ايه اصلا؟
انا كمان بحبها وبحترمها و بحسها فن من قبل ما اكتب الموضوع كانت عندى من زمااااااااان
عودا حميدا
بقالك كتير مستغطيه
ربنا يبارك فيكي
لكن انا مش مستغرب من تصرف الطفل حيث ان ده بقي افراز منطقي للحالة المجتمع الان
ربنا يسترها بجد
علينا دور كبير قوي
:)
شكرا على ترحيبك دة يا جميلة
كنت شبه متأكدة من الجامغة بس كان عندي أمل إني أطلع غلطانة :). أصل شغلي مرتبط بالجامعات:))، وبروح تربية عين شمس فقلت.... يمكن
:)
ربنا يقدرك فعلا تعملي كل حاجة كويسة بتتمنيها يا سمية
ربي يبارك فيكي يا سمية ويحنن قلبك ويسعدك يارب .
أسرة منتدى زبد البحر يتمنى منكم التواجد معنا في منتدى عالم المدونيين والمدونات
http://mhg1962.ba7r.org/forum.htm
إرسال تعليق